Skulen har i samarbeid med HFK investert i 17 stk. Oculus Go VR-briller, kraftig PC til å drive moderne dataspel, samt PlayStation 4. VR-teknologien er no komen så langt, at VR-brillene har innebygd maskinvare og høgtalarar, laga i pustande materiale og stroppar for individuell tilpassing. Dette, kombinert med fast ladestasjon i eige multimediarom, gjer tilgjenga og brukarvennlegheita stor for alle tilsette og elevar på KVV.
Innfallsvinkelen til læringsopplevinga kan grovt sett delast i tre (etter modell ifrå Spillpedagogene):
1. Som historiar, kan opplevinga la eleven ta del i eller skape ei historie, ein digital litteratur, kopla på alle fag der litteratur, tekstanalyse og kreativitet er sentralt.
2. Som visualisering/demonstrasjon, kan elevane få innsyn i normalt utilgjengelege eller abstrakte prosessar og fenomen, særleg eigna innanfor alle realfaga og yrkesfag.
3. Som digital ekskursjon kan elevane oppleve ulike stader og situasjonar rundt om i verda, både notid og fortid, der særleg dei humanistiske faga finn mykje relevans, samt at det opnar for å prøve ut ulike roller og val og erfare konsekvensane av dei.
Samla vil såleis digitale verktøy og program kunne nå læringsmål innanfor alle fag.
KVV fekk inspirasjon til å begynne med prosjektet etter eit besøk til Nordahl Grieg VGS, der bruk av spel i undervisinga har vore i fokus i lengre tid. Ifrå dette har me så knytt kontaktar til ulike institusjonar/personar som jobbar/forskar på dette. Her har me også funne inspirasjon til ulike undervisingsopplegg, samt utvikling av eigne.
